Ronaldo នឹងអវត្តមានក្នុងប្រកួតអន្តរជាតិប៉ះប៉ូឡូញ និងស្កុតឡែន

ខ្សែ​ប្រយុទ្ធ​Cristiano Ronaldo នឹង​មិន​មាន​វត្តមាន​ក្នុង​បញ្ជី​ឈ្មោះ​កីឡាករ​សម្រាប់​ប្រកួត​មិត្តភាព​ទល់​នឹង​ក្រុម​ជម្រើស​ជាតិ​ប៉ូឡូញ​និង​ស្កុតឡែន​នៅ​ខែ​តុលា​នេះ​ទេ។

កីឡាករមិនមានឈ្មោះក្នុងបញ្ជីកីឡាករក្រុមជម្រើសជាតិព័រទុយហ្គាល់ សម្រាប់ត្រៀមប្រកួតទាំងពីរខាងលើឡើយ។

មិនទាន់មានការបកស្រាយច្បាស់លាស់មួយអំពី ការ​មិនមានឈ្មោះ Ronaldo ឡើយ គិតមកទល់ពេលនេះ។ ទោះជាយ៉ាងណា គ្រូ​បង្វឹក​ជនជាតិ​ព័រទុយហ្គាល់ លោក Fernando​ Santos ក្នុងថ្ងៃនេះបាន​លើក​ឡើង​ថា៖ " នៅ​ពេល​ខាង​មុខ​គ្មាន​អ្វី​មក​រារាំង​ Ronaldo​ ក្នុង​ការ​មក​លេង​ឲ្យ​ក្រុម​ជម្រើស​ជាតិ​ឡើយ" ។

កាល​ពី​ខែ​កញ្ញា​កន្លង​ទៅ​លោក​Santos បាន​និយាយ​ថា​ អតីត​ខ្សែ​ប្រយុទ្ធ​នៃ​ក្លឹប​Real Madrid និង​ក្លឹប​Manchester United ខក​ខាន​លេង​ក្នុង​ប្រកួត​មិត្តភាព​ទល់​នឹង​ក្រុម​ជម្រើស​ជាតិ​ក្រូអាត​និង​អ៊ីតាលី​ដោយ​សារ​តែ​រូប​គេ​ត្រូវ​ការ​សម្រាក​យក​កម្លាំង​។

កីឡាករ​របស់​ក្លឹប​ Juventus នេះ​ក៏​បាន​ខក​ខាន​ប្រកួត​ក្នុង​ក្របខ័ណ្ឌ​កំពូល​អឺរ៉ុប​ UEFA Champions Leauge ទល់​នឹង​ក្លឹប​ Young Boy នៅ​ក្នុង​សប្ដាហ៍​នេះ​ដោយ​ការ​ជាប់​បម្រាម​។

កាលពីពេលថ្មីៗនេះ ខ្សែ​ប្រយុទ្ធ Ronaldo ត្រូវបានស្ដ្រីម្នាក់ចោទប្រកាន់ថា បានចាប់រំលោភរូបនាង កាលពីឆ្នាំ ២០០៩ ក្នុងសណ្ឋាគារមួយនៅសហរដ្ឋអាមេរិក។ ស្ដ្រីបានដាក់ពាក្យប្ដឹង កីឡាករព័រទុយហ្គាល់។

ទោះជាយ៉ាងណា ម្ដងហើយ ម្ដងទៀត Ronaldo បានបដិសេធការចោទប្រកាន់នេះ៕

ប្រភព៖ BBC ប្រែ​សម្រួល៖ ហ៊ីម រស្មី