គ្រូ Arsenal មើលឃើញឱកាស ក្រោយ Ozil ចូលនិវត្តន៍ក្រុមជម្រើសជាតិ

អ្នក​ចាត់ការ​របស់​ក្លឹប​ Arsenal លោក​ Unai Emery ជឿ​ជាក់​ថា​ការ​ចូល​និវត្តន៍​ពី​ក្រុម​ជម្រើស​ជាតិ​របស់​ខ្សែ​បម្រើ​ Mesut Ozil អាច​ផ្ដល់​ប្រយោជន៍​ដល់​ក្លឹប​ ដោយ​សារ​តែ​កីឡាករ​ផ្ដោត​អារម្មណ៍​បាន​ល្អ​ក្នុង​ការ​លេង​។

Emery បាន​និយាយ​ថា​៖ " ខ្ញុំ​បាន​និយាយ​ជាមួយ​ក្រុមកីឡាករ​ដែល​លេង​ឲ្យ​ក្រុម​ជម្រើស​ជាតិ​។ វា​មិន​មែន​ជា​ការ​ងាយ​ស្រួល​ទេ​សម្រាប់ពួកគេ ក្រោយទើបលេង​ប្រកួត​ (អន្តរជាតិ) រួច។ នៅពេល​ដែល​កីឡាករ​ឈប់​លេង​ប្រកួត​ទាំង​នោះ នោះ​ពួក​គេ​អាច​មាន​ពេល​ច្រើន​សម្រាប់​ការ​ហ្វឹក​ហាត់​និង​ អភិវឌ្ឍ​សមត្ថភាព​ពួក​គេ​បាន​ល្អ​ជាង​មុន​។ ក្នុងករណី Ozil ក៏អញ្ជឹងដែរ។ ការ​ឈប់លេងឲ្យក្រុមជម្រើសជាតិ អាចបើកផ្លូវឲ្យគេយល់អំពីយុទ្ធសាស្ត្រនៃការលេងរបស់យើង កាន់តែលឿន"។

តាំង​ពី​ឈប់​លេង​ឲ្យ​ក្រុម​ជម្រើស​ជាតិ​អាល្លឺម៉ង់​មក​ Ozil បាន​ហ្វឹកហាត់​ជាមួយ​ក្លឹប​នៅ​កំឡុង​ International Break កាល​ពី​ពេល​ថ្មី​ៗ​នេះ។

នៅ​ដើមរដូវ​កាល​ថ្មី​នេះ​ កីឡាករ​កូន​កាត់​ទួរគី​-អាល្លឺម៉ង់​ Ozil មិន​ទាន់​បាន​បញ្ជូន​បាល់​ឲ្យ​មិត្ត​រួម​ក្រុម​ស៊ុត​ចូល​ម្ដង​ឡើយ​ ប៉ុន្តែ​រូប​គេ​បាន​រក​គ្រាប់​បាន​ ៣​គ្រាប់​ក្នុង​ការ​បង្ហាញ​ខ្លួន​ ៥​លើក៕

ប្រភព៖ Bleacherreport   ប្រែ​សម្រួល៖ ហ៊ីម រស្មី